Morrem dous pescadores galegos nas águas da Namíbia

10 de Novembro de 2006

Dous trabalhadores galegos do mar morrêrom num acidente acontecido em águas namibianas, na costa africana, ao naufragar o buque "Díaz", da empresa Diaz Trawling, ligada ao grupo empresarial multinacional Pescanova.

Além dos dous pescadores galegos, um terceiro trabalhador de nacionalidade namibiana faleceu também no acidente, que aconteceu na tarde de ontem e envolveu 25 trabalhadores, a maior parte da Namíbia, e quatro de nacionalidade galega.

Ao que todo indica, o acidente aconteceu no paralelo 25, a 60 milhas náuticas da costa, tendo a sua origem numha explosom por causas nom esclarecidas e num incêndio que obrigou a umha evacuaçom urgente e provocou o afundamento da embarcaçom, morrendo os trabalhadores durante a operaçom de abandono do buque.

Sabe-se que o barco levava mais de 10 anos em activo, sem que tenham transcendido maiores concreçons quanto às condiçons de segurança. Nom queremos deixar de enviar as nossas condolências às famílias dos trabalhadores falecidos, num sector em que o risco é especialmente alto, em nom poucoas ocasions devido à precariedade das embarcaçons e dos meios de segurança, bem como os insuficientes meios de resgate.

 

Voltar à página principal