BNG e PP votam juntos em Ferrol para favorecerem a planta de gás de Reganosa

17 de Novembro de 2006

O pleno da Cámara Municipal de Ferrol encenou nesta mesma manhá a falta de escrúpulos do Bloque Nacionalista Galego, que serviu de apoio imprescindível ao PP para poder aprovar a proposta do presidente da Cámara, Juan Juncal, de retirada do recurso contra a planta de gás em Mugardos.

As divisons existentes entre as duas facçons da direita governante (PP e Independientes por Ferrol) deixava o Partido Popular em minoria com a sua proposta, mas aí apareceu Jaime Velho (vice-presidente da Deputaçom Provincial da Corunha) para defender, em nome do BNG, o mesmo objectivo que o PP: favorecer o avanço do perigoso projecto de Reganosa.

Ex-opositor à planta de gás

Dá-se a circunstáncia de que o próprio Jaime Velho encabeçou, até nom há muito tempo, o sector que dentro do BNG trasanquês se opunha à localizaçom da planta de gás em pleno coraçom da Ria de Ferrol. Porém, os poucos escrúpulos já mostrados polo ex-presidente da Cámara do BNG noutras ocasions servírom, mais umha vez, para deixar em evidência a degeneraçom do projecto político do Bloque. O trabalho sujo de apoiar a iniciativa do PP, que nem PSOE nem IU se atrevêrom a fazer, foi assumido polos autonomistas, sob a batuta de Velho.

O público assistente, entre o qual se achavam representantes do Comité de Emergência da Ria e da Associaçom Vicinal de Meá (Mugardos) , opostos à planta de Reganosa, ficou atónito ao comprovar que todos os vereadores e vereadoras do BNG (nom só Jaime Velho, é claro) apoiavam a proposta do Partido Popular, garantindo a vitória da moçom da direita espanhola. Gritos de "vendidos" ressoárom na sala de plenos, enquanto Jaime Velho e os seus companheiros e companheiras abandonavam o local.

A decisom institucional de hoje supom a renúncia ao recurso de cassaçom contra a recente sentença que dava por bom um estudo de impacto ambiental da empresa, que incumpre a normativa na elaboraçom desse tipo de documentos. Assim, Reganosa tem mais aberto do que nunca o caminho para pôr finalmente em andamento a planta de gás em terrenos cedidos pola Cámara Municipal mugardesa, também em maos do BNG.

 

Voltar à página principal

 

 

Jaime Velho, vice-presidente da Deputaçom corunhesa e vereador da Cámara Municipal de Ferrol ao mesmo tempo, foi opositor ao projecto de Reganosa, mas soubo virar o casaco a tempo