Centenas de vizinhas e vizinhos de Ferrol voltam a mobilizar-se contra a especulaçom urbanística
27 de Abril de 2007
Coincidindo com um pleno municipal ordinário, as entidades que venhem mobilizando-se em Ferrol nos últimos meses contra os projectos urbanísticos do PP e IF voltárom às ruas exigindo a paralisaçom das obras na Porta Nova, onde pretendem construir um edifício num espaço público e cedê-lo a umha empresa privada.
Às 17 horas, uns 40 vizinhos e vizinhas ocupárom os terrenos em que avançam as obras, apesar da proibiçom da Junta, que reclamou a paralisaçom das mesmas. Durante umha meia hora estivérom as pessoas concentradas no interior das obras a exigir o fim das mesmas, diante de vários carros policiais e presença de polícia secreta. A seguir, as pessoas congregadas avançárom em manifestaçom em direcçom à Cámara Municipal de Ferrol, onde decorria um pleno nesse momento.
Dúzias de participantes na concentraçom conseguírom aceder ao salom de plenos, onde o Governo municipal votou pola continuidade das obras contra a proposta da oposiçom para que fosse revisado o projecto. Como noutras ocasions, o vice-presidente da Cámara e líder de IF, Juan Fernández, voltou a desafiar com a sua atitude a presença vicinal, sendo apupado pola vizinhança.
Militantes de NÓS-UP participárom da mobilizaçom, sendo a organizaçom da esquerda independentista umha das impulsionadoras, junto a numerosas entidades sociais de Ferrol, da dinámica popular contra o urbanismo selvagem da direita espanhola governante.
Há que lembrar que a Junta da Galiza resolveu recentemente que o PP e IF poderiam levar avante o projecto, colocando apenas problemas formais que nom fôrom admitidos por Juan Juncal, presidente da Cámara polo PP. Com a proximidade das eleiçons, BNG e PSOE, afastados de partida das reivindicaçons populares, aderírom às últimas iniciativas para deixarem ver os seus candidatos e candidatas entre a numerosa vizinhança progressista que participa nas mobilizaçons.