Primeira vítima mortal da violência machista neste ano

5 de Fevereiro de 2007

Umha vizinha de Meanho, na comarca do Salnês, converteu-se na primeira galega falecida em conseqüência de umha agressom machista neste ano 2007. Mari Carme Fontám Torres, de 50 anos, morreu esfaqueada no seu próprio lar polo companheiro, Benito Paz Pinheiro, de 48 anos, no passado domingo, num contexto marcado polo aumento, nas últimas semanas, de agressons em diferentes pontos do nosso país.

A morte terá acontecido, ao que todo indica, polas graves feridas produzidas por umha arma branca de grandes dimensons, ao terem afectado os órgaos vitais da vítima.

NÓS-UP manifestou a sua solidariedade com a família da mulher falecida e reclamou ao Governo autonómico medidas para evitar que continuem a produzir-se agressons como a que custou a vida à vizinha do Salnês. Apelou também a participar nas concentraçons que serám convocadas polas entidades feministas galegas em repulsa polo assassinato de Meanho.

 

Voltar à página principal