Centros sociais retomam actividade após o Verao

13 de Setembro de 2007

Basta dar umha vista de olhos aos blogues dos principais centros sociais do País para comprovar a sua reactivaçom após um certo impasse estival. É o caso da Baiuca Vermelha, a Revira ou Aguilhoar, no sul, do Pichel no centro e da Artábria no norte, para só referir alguns exemplos. Além disso, continuam os preparativos de um novo centro social na Corunha e foi marcada já a inauguraçom do Mádia Leva em Lugo.

No sul

A Baiuca Vermelha organiza nestes dias diferentes actividades no centro social de Ponte Areas, incluindo umha palestra sobre sindicalismo, um Jantar Popular e umha Jornada de Jogos Populares. O primeiro decorre no dia 14, sexta-feira, e conta com a presença do secretário confederal de Negociaçom Colectiva e Saúde Laboral da CIG, Antolim Alcántara. Falará sobre a situaçom sociolaboral da Galiza e o acto começará polas 21 horas.

Já no sábado dia, 15 a partir das 14h, no centro social da rua Redondela, 11, terá continuaçom no Parque das Pombas com umha Jornada de Jogos Populares organizada pola Assembleia Aberta para reivindicar a recuperaçom dos Jogos Tradicionais e Populares galegos na comarca.

Na comarca da Límia, o centro social da entidade juvenil Aguilhoar organiza a segunda ediçom do seu Festival da Mocidade, que desta vez contará com um debate sobre autodeterminaçom, actuaçons musicais, roteiros, jantares populares, obradoiros e outras actividades lúdicas e reivindicativas. Será em Vilar de Santos no sábado 29 de Setembro.

Em Ponte Vedra, o centro social da Revira abre um novo ano de cursos a preços populares. Nesta ocasiom, oferecem cursos de gaita, de Língua (nos padrons de Portugal e da Galiza), de guitarra e de pandeireta.:

No centro

O centros social O Pichel, na capital da Galiza, também iniciou as actividades de Outono, após umha bem sucedida segunda ediçom da Universidade Popular de Verao durante o mês de Agosto. Um jantar temático no dia 15, sábado, e um obradoiro de cozinha no mesmo dia, onde se ensinará a elaborar um doce de amoras, marcam o início de actividades.

Em Lugo, abre um novo centro social, o Mádia Leva, que celebra o evento com umha festa inaugural na sexta-feira, 14 de Setembro, a partir das 20:00h.

No Norte

Enquanto o colectivo promotor do novo centro social da Corunha, o Gomes Gaioso, continua com os trabalhos de condicionamento do local que já adquiriu como espaço para a nova entidade, em Trasancos a Fundaçom Artábria anunciou já um amplo programa de actividades para os meses de Setembro e Outubro, incluindo concertos, apresentaçons de livros, projecçons de documentários, etc. De partida, nesta sexta-feira dia 14 será projectado o documentário "A céu aberto", sobre as expropriaçons das Encrobas nos anos 70, a partir das 22 horas, e no sábado 15 apresenta-se a revista Gaiola Aberta, realizada por trabalhadores, trabalhadoras e pessoas internas em centros de saúde mental da Galiza. Será a partir das 19,30h.

Toda a informaçom está já disponível no seu blogue.

 

Voltar à página principal