Centros sociais celebram Festas de Inverno

26 de Dezembro de 2007

Os cada vez mais numerosos centros sociais normalizadores da língua e a cultura galegas existentes em cidades e vilas da Galiza apresentárom programas de festas de Inverno para despedir o ano velho e receber o novo. Vamos dar umha vista de olhos às propostas dos centros sociais de que nos chegárom notícias: os de Ponte Areas, Ponte Vedra, o Ribeiro, Ourense, Boiro, Compostela e Ferrol:

Sul

É o caso da Baiuca Vermelha, o Centro Social independentista de Ponte Areias, que no sábado 29 de Dezembro, a partir das 22h, fará umha ceia de viragem de ano na qual as pessoas associadas e amigas da Assembleia Aberta do Local Social despedirám o ano 2007. A Baiuca Vermelha, que estreou recentemente novo blogue, começará o ano com umha exposiçom de homenagem ao Che Guevara polos 80 anos do seu nascimento.

Será entre os dias 1 e 15 de Janeiro e inclui fotografias biográficas distribuídas pola Associaçom de Amizade Galego-Cubana Francisco Vilhamil, sob o título "Che Guevara. Aqui vai um soldado da América.

Em Ourense, a Esmorga acolhe, no mesmo dia 29 de Dezembro, um concerto de música galega de qualidade, com os Som do Galpom, que estám de tourné pola Galiza e já actuárom nos centros sociais de Vigo e Ferrol. Em Ourense será polas 22h00 e o preço dos bilhetes é de 3 euros para sócios e sócias, e de 4 euros para o resto do público.

No caso de Ponte Vedra, o Centro Social da Revira organiza umha Festa de Viragem de Ano na noite do dia 31 de Dezembro, a partir da 1h30, garantindo os mesmos preços populares que no resto do ano.

No Ribeiro, a Associaçom Arrincadeira organiza também na sexta-feira 28 de Dezembro umha assembleia-ceia no Bodegom do Josinho, a partir das 21h30.

Centro

Na capital da Galiza, temos conhecimento da campanha informativa da Gentalha do Pichel para difundir a recuperaçom da figura do Apalpador, representativa da nossa tradiçom mitológica nalgumhas comarcas orientais. Além disso, realizárom um bem sucedido leilom de materiais usados no passado dia 21, além de umha feira de roupa de ocasiom e um karaoke lusófono.

Em Boiro, O Aturuxo, que adquiriu recentemente um local, está a trabalhar no condicionamento para poder abrir o antes possível. Entretanto, organizam um roteiro pola Serra do Barbança, no dia 26.

Norte

Enquanto a associaçom promotora do Centro Social Gomes Gaioso continua com as obras no local, em Ferrol, a Fundaçom Artábria preparou um amplo programa de actividadese para as Férias de Inverno, incluindo a emissom ao vivo dos jogos das selecçons galegas no dia 27. Já no dia 28, a II Festa Sing Star, ou seja, um karaoke. Do dia seguinte, sábado, 29, às 22h30, o grupo Machina estará novamente na Fundaçom Artábria para nos deixar a suas melodias emo-core.

A festá de viragem de ano, na noite do dia 31, é já um clássico no Centro Social da Artábria, pois vem celebrando-se sem interrupçom desde 1998. Nesta ocasiom, a proposta é umha "Festa Hortera".

E já no novo ano, no dia 4, concerto de música spiz-folc balcánica, com o grupo Ulträkäns, a partir das 22h30, e no dia 5 o também clássico leilom ártabro, com objectos usados cedidos por pessoas associadas e amigas da Artábria, incluindo o sorteio da Cesta.

 

Voltar à página principal