BNG inventa umha nova disciplina desportiva: o "espaÑoleando"

8 de Agosto de 2007

"EspaÑoleando" poderia ser o nome da nova disciplina "desportiva" que nestes dias vem praticando o BNG à frente da Conselharia da Cultura e da Direcçom Geral para o Desporto. Eles preferem denominá-lo "desporto galego", mas na verdade trata-se apenas da promoçom da "Vuelta Ciclista a España", que graças ao BNG nesta ocasiom terá na Galiza parte substancial do seu percurso alienante.

A iniciativa, negociada directamente pola seica "nacionalista" conselheira da Cultura, Ánxela Bugalho, garante que as três primeiras etapas da corrida ciclista espanhola tenham a Galiza como cenário. Serám as que partam de Vigo para Alhariz (jornada inicial) e as duas seguintes, entre Alhariz e Compostela, e entre a capital e Viveiro.

Galiza com mais peso em Espanha

Com esta "conquista programática" do BNG, deveremos supor que esses autoproclamados "nacionalistas" fam um contributo concreto ao "maior peso da Galiza em Espanha", que continuamente situam como objectivo do seu labor político-institucional. Nalguns lugares da Internet já se fala do que parece finalmente significar "fazer país" para o Bloque Nacionalista Galego.

Estamos agora é à espera de que a referida conselheira, o próprio Quintana, ou talvez o seu deputado em Madrid Francisco Rodrigues, nos expliquem como vai esta iniciativa favorecer a autoafirmaçom nacional dos galegos e as galegas, ou o avanço em direcçom à consolidaçom de selecçons nacionais próprias que irá implicar. Também agradeceríamos que qualquer um desses três personagens explicassem aos galegos e às galegas porquê desviam 1.401.214 € dos fundos públicos galegos no financiamento do desporto-espectáculo espanhol em lugar de os investirem em fomentar o desporto por e para o nosso país.

Ao que todo indica, deveremos ir-nos afazendo a que estes políticos praticantes do "nacionalismo bem entendido" continuem a dar espectáculos tam vergonhosos como este. Deveremos afazer-nos a vê-los praticar a nova disciplina desportiva: o "espaÑoleando".

 

Voltar à página principal