Centro social compostelano realizou I Jantar Revolucionário

30 de Outubro de 2007

O Centro Social Henriqueta Outeiro realizou na tarde do sábado dia 27 o primeiro Jantar Revolucionário mensal, dedicado desta vez à cozinha cubana e ao revolucionário cubano-argentino Ernesto Che Guevara.

O mojito foi o grande sucesso da velada da primeira iniciativa de confraternizaçom gastronómica entre sóci@s e amig@s do Centro Social compostelano, que incluiu também "mariquitas de plátano macho" seguidas pola salada tropical de espinafres, abacate, pepino, papaia e mango; a seguir, arroz congri com porco. Os sabores de Cuba culminárom com um magnífico alfanjor argentino. Já à sobremesa, houvo mate e café à escolha e, perante a “reivindicaçom popular”, voltou a elaborar-se mojito para todos e todas.

Tal como se explicou antes da intervençom do cantor compositor José Constenla, a primeira iniciativa musical-gastronómica de “carácter experiental” foi um sucesso que dará passagem a jantares mensais com o objectivo de homenagear destacad@s revolucionári@s da Galiza e a nível internacional.

Assim, para o mês de Novembro foi anunciado um jantar russo em homenagem ao grande dirigente comunista Vladimir Ilich Ulianov, Lenine, coincidindo com o 90 aniversário da Revoluçom Bolchevique que comemoramos neste ano.

Aproveitando a presença de um número importante de sóci@s e amig@s, a ceia serviu para informar da constituiçom, na quinta-feira passada, do “Centro de Estudos Marxistas Henriqueta Outeiro”. Esta iniciativa emergente tem como objectivo dotar o Movimento de Libertaçom Nacional Galego de umha ferramenta de análise, compreensom e estudo da realidade que permita melhorar a capacidade de intervençom e transformaçom. Fugindo do academicismo, mas nom do rigor analítico, o novo centro tenciona, segundo explicou o colectivo que o impulsiona, criar um foro de debate aberto a todos aqueles e aquelas que consideram imprescinível a formaçom ideológica para o sucesso da acçom política da esquerda independentista e socialista galega.

A jornada concluiu com a projecçom da Entrevista de Ignacio Ramonet a Fidel sobre o Che Guevara, depois de que o José Constenla cantou temas de Fran Delgado, Sílvio Rodríguez, Carlos Puebla e Vitor Jara, entre outros.

A Assembleia Aberta do C. S. Henriqueta Outeiro manifestou a sua satifaçom polo sucesso da sua modesta, mas sentida e comprometida, homenagem ao combatente comunista Ernesto Guevara, no quadragésimo aniversário da sua morte combate na Bolívia.

 

 

Voltar à página principal