Lançam iniciativa pola galeguizaçom da toponímia nas estradas

6 de Agosto de 2007

O que nas últimas décadas tem sido umha habitual e saudável prática espontánea do movimento normalizador galego acha agora um espaço próprio na rede, com o lançamento do blogue "Sinaliza!".

Trata-se de mais umha iniciativa popular pola recuperaçom dos nomes de lugar galegos, que costumam ser deturpados polas instituiçons espanholas e autonómicas na sinalizaçom existente nos espaços públicos da Galiza. A ideia é constituir "o nosso particular mapa de estradas, o espaço virtual para o activismo normalizador", segundo se afirma na apresentaçom do blogue. A pretensom, além de testemunhar a actividade galeguizadora na sinalética, é "completar o puzzle das comarcas galegas, ter fotografias de todas as placas dos concelhos da Galiza".

O blogue fica assim aberto à recepçom de fotografias enviadas polas pessoas que tenham acesso a exemplos práticos de recuperaçom toponímica em qualquer ponto do País, esclarecendo que se trata de umha iniciativa que "nom pertence a nengum colectivo ou organizaçom", sendo apenas um blogue "popular, colectivo, espontáneo e interactivo", para ser preenchido "entre todas e todos".

Como critério de correcçom, o Sinaliza! recomenda consultar o Topogal, catálogo toponímico editado pola AGAL, e disponibiliza um correio electrónico para o envio de imagens: sinaliza@gmail.com, indicando a localidade e comarca onde foi feita a rectificaçom.

 

Voltar à página principal