PSOE, BNG e PP dam a Tojeiro Medalha de Ouro da Deputaçom da Corunha

30 de Novembro de 2007

O presidente da Deputaçom da Corunha, o 'socialista' Salvador Fernandes Moreda, entregou a Medalha de Ouro da instituiçom provincial ao empresário Roberto Tojeiro, promotor do projecto de REGANOSA no coraçom da ria de Ferrol, polo que os três grupos políticos institucionais denominam 'excelência empresarial'.

Além do mais, o PSOE, o BNG e o PP reconhecem em Tojeiro o mui capitalista valor de ser umha "pessoa que se forjou a si própria", já que os políticos a soldo da Deputaçom consideram admirável "a sua capacidade de trabalho e a sua perseverança no esforço desde que, ainda sendo muito novo, compaginava a assistência à escola com o trabalho no negócio familiar".

O que parece umha liçom de valores incluída nos velhos livros de texto franquistas é a justificaçom do PSOE, o BNG e o PP para premiar o seu amigo milionário, proprietário do Grupo Tojeiro, que factura 1.300 milhons de euros através de empresas como GADISA (sector da distribuiçom), SOAGA, FABRISA (sector químico), Forestal de Atlántico, IMEGASA e REGANOSA (sector energético).

O banqueiro José Luís Mendes, de Caixa Galicia, louvou também, no acto de entrega do prémio, o trabalho de Tojeiro, fazendo referência ao seu potencial económico. E também em apoio da iniciativa dos partidos serventes dos seus interesses, o presidente da Associaçom Galega de Empresa Familiar, José Silveira, nom quijo deixar passar a ocasiom para lembrar a responsabilidade de Tojeiro na imposiçom da regasificadora em Mugardos, afirmando que esse projecto "brinda umha oportunidade à indústria da Galiza para se conectar com o resto de Espanha".

Desconhecemos que cara terá posto Pablo Vilamar, vice-presidente da Deputaçom polo BNG, que leva anos defendo o projecto de REGANOSA como exemplo da economia autocentrada na própria Galiza, ao ouvir o fiel retrato da funçom da regasificadora de Mugardos, feita por um dos amigos de Roberto Tojeiro.

Em definitivo, o PSOE, o BNG e o PP agradecem sem pudor o financiamento e outros favores inconfessáveis das grandes firmas, aplicando os projectos que ditam os que verdadeiramente mandam. E por se isso fosse pouco, rim-se do povo ao entregar prémios de 'excelência' aos especuladores maiores do Reino (de Espanha, entenda-se).

 

:: Mais informaçons sobre o mesmo tema

Anxo Quintana louva o papel de La Voz de Galicia porque "fai País sendo a voz da sua sociedade". (+...)

[TV] Qualificam de 'farsa' a comissom parlamentar de inquérito sobre a Cidade da Cultura. (+...)

BNG quer consensualizar com o PP e o PSOE a "vertebraçom da cultura nacional" através da Cidade da Cultura. (+...)

Apoios a Zapatero e o Bourbon: Quintana assume o papel de 'hominho de estado'. (+...)

Junta da Galiza financia os media mais reaccionários e antigalegos. (+...)

 

Voltar à página principal