Condado homenageia vítimas do fascismo

26 de Outubro de 2007

A entidade popular de recuperaçom da memória histórica do Condado organiza no próximo fim de semana umha homenagem às vítimas do fascismo. Em concreto, a Comissom pola Memória Histórica do 36 de Ponte Areas organiza as Jornadas “As fosas de Franco”, que decorrem a 27 e 28 de Outubro no Auditório do Centro Cultural da paróquia ponteareana de Ginzo.

Na primeira sessom, realizará-se um debate sobre as fosas do Pinhal do Foxo e do Porto do Oueiro, onde entre 10 de Setembro de 1936 e 10 de Outubro de 1937 esquadrons da morte falangistas e paramilitares matárom 22 pessoas, posteriormente soterradas no adro das igrejas de Ginzo e Areas.

Participarám familiares de represaliados, o arqueólogo que dirigiu a exumaçom das fosas de Areas e Ginzo, um psicólogo e o coordenador da exumaçom das fosas do Amenal.

Também será projectado um audiovisual sobre estas exumaçons, realizadas por primeira vez em território da Igreja. Finalizará a sessom com um concerto deA Quenlla.

Ao dia seguinte, domingo 28, realizará-se umha plantaçom colectiva de flores no adro da igreja de Ginzo e serám entregues as “Rosas pola memória”.

 

Voltar à página principal