Primeira Linha em Rede: um ano ao serviço da Galiza que luita

Em 31 de Maio de 2003, cumpre-se o primeiro aniversário da activaçom do sítio web do nosso Partido (www.primeiralinha.org), web baptizado como Primeira Linha em Rede. Se quigermos remontar aos inícios deste projecto de comunicaçom, teremos que referir a aprovaçom, por parte do III Congresso de Primeira Linha, de um novo organismo partidário encarregado de desenvolver o correspondente mandato congressual.

Com efeito, em 2 e 3 de Março de 2002, o máximo organismo do nosso Partido reunido em Compostela sob a legenda Comunismo galego do Século XXI exprimiu a necessidade de pôr os meios para que Primeira Linha desse o salto à Internet, um espaço aberto para a comunicaçom e socializaçom do projecto político comunista, independentista e antipatriarcal que representamos. Imediatamente, iniciou-se um trimestre de trabalho específico neste campo, que serviu para activar o sítio web. Desde o princípio, pretendemos ultrapassar a exposiçom estática da informaçom estritamente partidária, assumindo o repto de informar também sobre a realidade da Galiza e do mundo com a óptica revolucionária e independentista que define o nosso Partido.

É sabido que o monopólio da comunicaçom é fulcral na manutençom do sistema actual, o capitalismo. De facto, representa um veículo ideológico de primeira magnitude que mantém as massas populares na mais absoluta alienaçom. O quase universal controlo da informaçom por parte das burguesias dos diversos estados capitalistas garante-lhes a inoculaçom calculada do lixo desinformativo e alienante que mantém a chamada "sociedade civil" à margem de qualquer posiçom crítica de fundo contra o sistema. Esta realidade é ainda mais evidente e decisiva em naçons dependentes como a Galiza, em que os mass media exercem de verdadeiros canos de esgoto a partir dos quais nos é despejada a cultura e a língua espanholas de maneira obrigatória e sistemática.

A esquerda independentista galega sabe bem o que isto todo significa, pois tem sido historicamente alvo preferente de campanhas constantes de desinformaçom, desprestígio e censura por parte dos meios desinformativos espanhóis e galego-espanhóis que monopolizam a comunicaçom social da Galiza. É por isso que as organizaçons soberanistas galegas sempre situamos como necessidade premente a activaçom de meios de comunicaçom próprios e directos com a sociedade galega, nomeadamente com o seu povo trabalhador, por forma a evitar a distorsom censora e manipuladora a que os media nos submetem.

É dentro desse histórico objectivo que se situa a necessidade de criar um espaço próprio para o marxismo independentista galego na rede de redes, tendo em conta as infinitas potencialidades que oferece a Internet face aos meios impressos convencionais.

Com a perspectiva que dá um ano de permanência ininterrompida na Internet, e em confronto com os objectivos marcados inicialmente, a nossa avaliaçom destes doze meses de trabalho dificilmente poderia ser mais positiva. Isto é assim nom porque Primeira Linha em Rede tenha cumprido já todos os seus fins neste meio, nem por ter atingido o topo dos sítios galegos mais visitados da Internet, ainda que o crescente número de visitantes registados até hoje é o melhor certificado da procura popular existente de informaçom anti-sistémica na Galiza.

Na verdade, iniciamos esta andaina com toda a modéstia, marcando umhas metas simples, ainda que bem clarinhas, a cumprir:

1.- achegar informaçom constante sobre a actualidade da Galiza a um número crescente de visitantes;

2.- exercer um sério labor contra-informativo frente aos ataques dos meios do sistema, denunciando o seu papel;

3.- dar a maior continuidade possível às actualizaçons;

4.- dar a conhecer em ámbitos novos e a nível internacional a existência de Primeira Linha e do projecto político que representa.

Quanto ao primeiro objectivo, só temos que dar umha olhadela a secçons como as de Destaques Anteriores, MLNG, Documentaçom, Biblioteca Marxista em Galego, etc, para comprovar o grande número de notícias, artigos, reportagens, testemunhos, documentos, imagens e até livros que componhem hoje Primeira Linha em Rede. No que di respeito ao número de visitantes, o crescimento sustentado das visitas mês a mês, bem como o número de páginas visitadas, falam por si sós, segundo comprovamos no gráfico que acompanha estas linhas.

Nos dous primeiros meses activa, entre Junho e Julho, Primeira Linha em Rede recebeu por volta das 3.000 visitas.

Entre 1 de Agosto e 31 de Dezembro houvo 22.005 visitas, que desagregadas por meses ficam como se segue:

Mês	Computadores	Número de visitas	Páginas	Hits	Bytes
Agosto	1.841	2805	41325	124302	1.38 GB
Setembro	2.377	3427	46016	127858	1.27 GB
Outubro	2.661	3814	35634	104535	1.17 GB
Novembro	4.205	6125	50180	139538	1.48 GB
Dezembro	3.546	5834	73213	192924	1.97 GB
Total	14630	22005	246368	689157	7.27 GB

Nos cinco seguintes meses, entre Janeiro e Maio, o crescimento foi marcado, atingindo-se um número total de 53664 visitas. Vejamos como se repartírom por mês:

Mês	Computadores	Número de visitas	Páginas	Hits	Bytes
Janeiro	3198	5467	57575	148868	1.44 GB
Fevereiro	4689	8131	72523	188042	1.73 GB
Março	6294	10791	71737	181423	1.98 GB
Abril	8683	14402	72359	193429	2.51 GB
Maio	9311	14873	74208	181168	2.33 GB
Total	32175	53664	348602	893431	10.00 GB

Portanto, o número total de visitas durante o primeiro ano atingiu o número de 78669, passando-se das aproximadamente 1.000 visitas do primeiro mês às 14873 visitas do mês que encerra o período. Quer dizer, neste mês de Maio temos recebido tantas visitas como quase nos primeiros cinco meses de actividade juntos.

Se o número de textos publicados e a sua constáncia, bem como o número crescente de visitantes, evidenciam a qualidade do labor contrainformativo que o nosso sítio web está a realizar, também os meios do sistema confirmam a nossa progressiva referencialidade, citando-nos em ocasions diversas (quase sempre para atacar-nos, naturalmente). A isto há que somar as visitas sistemáticas da Polícia e Guardia Civil espanholas, que já tentárom ocupar e contaminar os nossos discos rígidos em várias ocasions. Todo isto dá mostras de que, desde a sua modéstia, o nosso projecto comunicativo desempenha já um papel destacado na presença soberanista galega na Internet, o que até hoje mereceu o aumento constante de visitantes (meio milhar por dia na actualidade) e o seguimento que as forças repressivas nos fam ininterrompidamente.

Para quem nos visita com assiduidade, é fácil comprovar o nosso esforço de actualizaçom constante durante este primeiro ano de existência. Quase a diário, durante a maior parte dos doze últimos meses, penduramos novos materiais de interesse para qualquer galego ou galega preocupada com o que acontece no seu país e no mundo, sempre com umha perspectiva revolucionária marxista, antipatriarcal e independentista. A nossa atençom especial às dinámicas de luita em naçons sem Estado como a nossa, aos processos revolucionários, à luita pola libertaçom de género e ao ambientalismo, bem como aos mais diversos movimentos sociais da Galiza e do mundo, som sinais de identidade deste espaço elaborado, como corresponde, 100% na nossa língua nacional.

O nosso acesso a novos ámbitos e sectores do país e do mundo vem-nos verificada polas abundantes e constantes comunicaçons electrónicas com pessoas que nos transmitem o seu apoio, nos fam chegar notícias ou nos pedem maiores informaçons sobre temas aparecidos no sítio ou sobre o próprio Partido. Também a progressiva inclusom do nosso endereço noutros sítios web dá conta do crescimento de Primeira Linha em Rede. Neste senso, cumprírom-se todas as expectativas prévias sobre as possibilidades que a Internet oferece a um projecto político como o nosso.

Além do público reconhecimento ao trabalho dos e das militantes do Partido, que possibilita a existência deste espaço marxista de comunicaçom da esquerda independentista galega na rede, nom queremos deixar de agradecer a colaboraçom de galizalivre.org nos primeiros passos prévios à activaçom do nosso sítio web. Também agradecemos a promoçom inicial realizada por webs e portais como o da AGAL, Vieiros e outras de entidades diversas do nosso país e do mundo, que servírom para dar-nos a conhecer aos primeiros e às primeiras visitantes alheias ao Partido. A todas elas, e principalmente a ti que nos visitas, muito obrigad@s e... Avante na luita!

Voltar à página principal