COMUNICADO PÚBLICO
DE NÓS-Unidade Popular ANTE A SITUAÇOM CRIADA POLA SUBA DO RECIBO
DO LIXO NA COMARCA
A Assembleia Comarcal
de NÓS-Unidade Popular em Trasancos quer fazer pública
a sua posiçom ante o anúncio de aumento na tarifa imposta por
SOGAMA no seu serviço de recolha de lixo em toda a comarca.
Comecemos por lembrar
que organizaçons ecologistas como ADEGA e a Federaçom Ecologista
Galega levam anos alertando sobre a inviabilidade do modelo de tratamento
do lixo que implica SOGAMA:
- Incineraçom ao serviço dos lobbies do sector. 80% do investimentode SOGAMA dedica-se à incineraçom. A percentagem da reciclagem nom passa de 10%, frente às percentagens nos países ponteiros em política de reciclagem, que chegam a 90% em materiais como o alumínio. Lembremos que a incineraçom supom a emissom de importantes quantidades de dioxinas, as substáncias mais tóxicas que se conhecem no Planeta.
- Desde o princípio se soubo que SOGAMA seria a opçom mais cara das possíveis, pola recolha e transporte de lixo, nomeadamente das zonas rurais. Planos como SOGAMA fôrom descartados noutros países, constituindo um resto desfasado das antigas políticas de tratamento do lixo. SOGAMA já anunciou que a tarifa actual de 32 euros por tonelada passará a ser de 54 euros por tonelada em 2005.
- SOGAMA prevê a geraçom de umhas 85.000 toneladas anuais de resíduos perigosos, de tal forma que a incineraçom de lixo gera tantos resíduos perigosos como o conjunto da indústria galega.
- Existem alternativas já em marcha, como a da Corunha, que já demonstrárom ser mais económicas para a cidadania, além de mais ecológicas, ao optarem pola reciclagem e a compostagem.
Como conclusom do anterior,
e em concordáncia com o movimento ecologista galego, NÓS-Unidade
Popular reclama que o problema actual do aumento do recibo do lixo na comarca
de Ferrol seja visto de maneira global. E para isso é necessário:
- Umha política de tratamento do lixo que rejeite a incineraçom e impulsione a reciclagem com o objectivo de atingir 100% do lixo produzido, bem como o espalhamento da cultura da reduçom na produçom de lixo.
- Umha aposta pola alternativa da reciclagem, frente à incineraçom, como opçom mais económica, mais barata no tratamento do lixo e que, portanto, incidirá no aforro da cidadania num gasto básico como este.
Umha vez que PP e PSOE sempre apoiárom a política de incineraçom prevista em SOGAMA, denunciamos a hipocrisia do Bloque Nacionalista Galego (BNG) ao protestar agora demagogicamente contra um aumento previsível dentro da concepçom de SOGAMA. Lembremos que essa formaçom política se comprometeu com o seu eleitorado a nom incorporar-se ao plano SOGAMA, incumprindo flagrantemente a sua promesa logo que acedeu a governos municipais como o de Ferrol ou As Pontes, a pesar de contar com o controlo da maior parte dos governos municipais da comarca. É o BNG quem deve umha explicaçom à cidadania progressista e nacionalista da comarca, ante a sua renúncia a umha reivindicaçom histórica do nacionalismo de esquerdas na Galiza como é o tratamento ecológico do lixo.
E nom serve dizer que
é responsabilidade do PSOE, já que som membros do BNG como Xaquim
Ros em Ferrol os responsáveis da área de ambiente nos concelhos
da comarca.