Diversas iniciativas de AGIR em vários pontos do país

17 de Dezembro de 2003

AGIR desenvolve diversas iniciativas durante estes dias em vilas e cidades da Galiza como Compostela, Ortigueira e Ponte Areas.

Em Compostela, a organizaçom estudantil independentista promoveu umha concentraçom contra a privatizaçom da universidade no passado domingo. A legenda elegida foi "Por um ensino público, ergue muros contra a privatizaçom". Várias dúzias de estudantes participárom nesta nova iniciativa dentro da campanha em defesa do ensino público por parte de AGIR.

Em Ortigueira, a filiaçom de AGIR está a defender a liberdade de expressom ante a perseguiçom de que som objecto estudantes independentistas por parte da Guardia Civil espanhola e o Governo municipal do Partido Popular. Identificaçons constantes, detençons e outras formas de pressom som sistematicamente aplicadas contra o estudantado mais consciente e activo na vila do Norte.

Apesar das duras condiçons para o trabalho político, AGIR mantém a sua actividade no seio do estudantado em Ortigueira.

E em Ponte Areas, AGIR organiza para hoje umha conferência sobre a situaçom da nossa língua no IES Pedra da Água, com a participaçom de Sílvia Capom, professora na Escola Oficial de Idiomas de Vigo e membro da AGAL. Quase 200 alun@s assistirám ao acto, que decorre na sala de actos do citado centro de ensino secundário. O Departamento de Língua Galega colabora com AGIR na organizaçom deste acto.

Mais informaçom sobre a actividade de AGIR no seu actualizado sítio-web


Voltar à página principal