Finalizárom
as VII Jornadas Independentistas Galegas
Na tarde de onte fôrom clausuradas as VII Jornadas Independentistas Galegas organizadas por Primeira Linha. Com a palestra intitulada "Diversas experiências de mulheres na política e nos movimentos sociais" fecharom-se as jornadas monográficas de reflexom e debate que o nosso Partido vem realizando inenterrumpidamente desde 1996.
A jornalista,
militante de MNG e presidenta do Comité Interempresas da CRTVG Begonha
Caamanho; Isaura Barciela, activista de diversos movimentos sociais e da Coordenadora
Areia Negra; Rosa Garrido da Executiva da CIG; e a militante do movimento
estudantil e juvenil galego e da Direcçom Nacional de AGIR Berta Lôpez
Permui, dérom a conhecer as imensas dificuldades que as mulheres que
participam activamente na vida política e social do país tenhem
à hora de intervir.
Begonha Caamanho
reivindicou o papel central das mulheres como sujeito de transformaçom
da actual sociedade capitalista mediante a desobediência e a rebeliom,
e reclamou a auto-organizaçom feminina e feminista como o instrumento
para poder mudar o actual estado de cousas, sendo muito crítica com
os partidos tradicionais de esquerda. Isaura Barciela explicou as imensas
dificuldades e obstáculos que as mulheres que promovérom Areia
Negra tivérom, e ainda tenhem, que superar para por em marcha as iniciativas
que como um autêntico revulsivo questionárom a atonia dos sindicatos
de professorado, assim como o sucesso das suas iniciativas como a cadeia humana
que configurada por dezenas de crianças uniu quarenta quilómetros
da Costa da Morte para denunciar a crise nacional provocada polo Prestige.
Rosa Garrido
caracterizou os sindicatos como um organizaçom nitidamente patriarcal,
e denunciou sem ambigüidades a marginalizaçom que padecem as mulheres
da CIG por parte dos órgaos de direcçom sob a hegemonia dos
homes, embora na actual Executiva há três mulheres num conjunto
de doze.
Berta Lôpez
Permui realizou um diagnóstico sobre a situaçom da mulher moça
no ensino galego e posteriormente abordou a situaçom e as medidas adoptadas
no combate ideológico feminista no seio da organizaçom estudantil
da esquerda independentista.